Бишкек-Исфана аба каттамы ачылды

Бүгүн Жогорку Кеңештин депутаттары Жусубали Исаев менен Мурадыл Мадеминов Баткен облусунун Исфана шаарында өткөн "Бишкек-Исфана" аба каттамынын ачылышына катышты. Бул иш-чарада аталган депутаттардан сырткары өкмөттүн Баткен облусундагы ыйгарым укуктуу өкүлү Жеңиш Разаков баштаган жергиликтүү бийлик өкүлдөрү, “Bishkek-air” авиакомпаниясынын жана жалпыга маалымдоо каражаттарынын өкүлдөрү болду. Депутат Жусубали Исаевдин айтымында, бүгүнкү Бишкек-Исфана жаңы авиакаттамы 120 миңден ашуун калкы бар Лейлек району үчүн чоң мааниге ээ. Алгач бул авиакаттам аптасына 3 ирет жүргүзүлмөкчү. Келечекте элдин суроо-талабына ылайык, авиакаттамды күнүгө жүргүзүү жагы караштырылат. Жергиликтүү эл жаңы авиакаттамдын ачылышына ыраазычылыктарын айтуу менен бирге бул каттамды күнүгө жүргүзүү өтүнүчтөрүн билдиришкен. Айта кетсек, бул авиакаттамды SAAW-340 үлгүсүндөгү 33 орундуу учак тейлейт, билет баасы 3500-4000 сомду түзөт.