Мушкер Владимир Кличко: "Тайсон Фьюриге утуларымды сезгем, эми атаандашымды жооптук беттешке чакырам"

Украиналык мушкер Владимир Кличко британиялык Тайсон Фьюриге утулган соң журналисттер менен жолугушуп, беттеш тууралуу оюн айтты.

"Чынын айтканда, Тайсон Фьюри мени утат деп ойлогон эмесмин. Бирок анын мага каршы беттеште өзүн жакшы көрсөткөнүн, жакшы даярдыкта экенин моюнга алам. Менин башкы катачылыгым аралыкты туура сактай албаганымда болду. Беттеш маалында утуларымды сезгем. Мен бүгүн атаандашымды кантип утуу керектигин биле алган жокмун. Эми мен жооптук беттеш (матч-реванш) өткөрүү укугумдан пайдаланам",- дейт Кличко.

Кошумчалай кетсек, беттеш 28-ноябрдан 29-ноябрга караган түнү орун алган. Анда 12-раунддук беттештин жыйынтыгында калыстар жеңишти Т.Фьюриге ыйгарышты (3 калыстын берген эсептери: 115-112, 115-112, 116-111). Бул беттештен кийин WBA Super, IBF, WBO жана IBO версиялары боюнча чемпиондук наамдар британиялык Тайсон Фьюринин карамагына өттү.