1916-жылкы Үркүн тууралуу тарыхый көркөм тасма тартылат

2016-жылдан тартып Үркүн тууралуу тарыхый көркөм тасма тартыла баштайт. Бул тууралуу SUPER.KG порталына тасмага продюсерлик кылып жаткан Мухтар Атаналиев билдирди.

Анын айтымында, тартуу боюнча бардык уюштуруу иштери аягына чыгып калды. "Эки жылдан бери Үркүндү тасмага тарталы деп камынып келгенбиз. Быйыл гана олуттуу киришип отурабыз. Жаштар тарыхыбызды билсин, унутпасын деген ойдо 1916-жылдагы окуяны экрандаштырууну чечтик. Башкалар "кыргыз эли совет учурунда да, азыр да жакшы жашап жатат" деп айтышы мүмкүн. Фильм аркылуу биз бүгүнкү жакшы жашоого кыйынчылыктар, күрөш менен жеткенибизди да чагылдырууну максат кылдык",- деди ал.

Ал эми режиссёр Медин Учкеев учурда актёр-актрисаларды тандоо иштери жүрүп жатканын белгилеп өттү. "Тарыхый тасма болгондуктан, жоопкерчилик да чоң болот экен. Биз тарыхчыларга, жазуучуларга кайрылдык. Үркүн тууралуу тасма тартып жатканыбызды уккан Үркүндүн катышуучуларынын туугандары да байланышка чыгышты",- деди.