"ЭЛДИК КАБАРга" жооп: Оштогу Рыспай Абдыкадыров атындагы көчөнү оңдоо иштери бүгүн аяктайт

Бүгүн, 2-декабрда Ош шаарындагы Рыспай Абдыкадыров көчөсүнүн оңдолушу тууралуу “ЭЛДИК КАБАРга” №21-Жол тейлөө мекемесинин жетекчиси Абдыганы Турдукулов түшүндүрмө берди. Анын айтымында, аталган көчөнү толук оңдоп-түзөө иштери бүгүн аяктайт.

“Учурда Абдыкадыров атындагы көчөгө жол белгилери түшүрүлүүдө. Ал эми жолдун кээ бир өйдө-ылдый болгон жерлерин подрядчиктер оңдошот. Азырынча атайын комиссия аткарылган жумуштун сапатын текшерүүгө ала элек”,- деди жетекчи.

Турдукулов жолду оңдоого бөлүнгөн акча каражатынын көлөмү тууралуу да маалымат берди. “Аталган көчөнү оңдоо иштерин 2015-жылдын 30-октябрында баштаганбыз. Транспорт жана коммуникациялар министрлигинин тапшырмасы боюнча оңдоо иштеринин сметалык баасы 25 миллион сомго барабар болчу. Бул акчанын 3 миллиону гана бөлүндү. Подрядчиктер өз акчасына иш жүргүзүшүүдө. Жалпысынан жолду оңдоо иштерине 19 миллион 900 миң сом жумшалды",- деп маалымдады Турдукулов.

"Рыспай Абдыкадыров атындагы көчө башынан аягына чейин оңдолду. Анын узундугу 1 чакырым 375 метр, ал эми туурасы 9-12 метрден 12-16 метрге чейин кеңейтилди”,- деп кошумчалады чиновник.