Футбол боюнча улуттук курама эл аралык рейтингде 108-орунду ээлеп, өз тарыхында жаңы рекорд жаратты

Бүгүн, 3-декабрда Эл аралык футбол федерациясынын (ФИФА) рейтинги жаңыланды. Ноябрдагы көрсөткүчтөргө карата жаңыланган рейтингде Кыргыз Республикасынын улуттук курамасы 16 орун алдыга жылып, 108-орунду ээледи. Карамагындагы упайлардын санын 324кө жеткирген курамдын тарыхында бул рекорддук көрсөткүч (буга чейинки рекорд 2006-жылы августта катталып, анда курам 119-орунду ээлеген).

Дүйнө чемпиондугунун тандоо турунда биздин курам менен бир тайпада жайгашкан курамдарга токтолсок, Австралия курамасы 57-орунду ээлесе, Бишкекте жеңилүү ызасын тарткан Иордания 87-орунду ээлеп турат. Ал эми Тажикстан курамасы 148-орунду камсыздаса, Бангладеш 182-орунда жайгашкан.

200дөн ашык мамлекеттин улуттук курамаларынын рейтингинде алдынкы үчтүктө Бельгия, Аргентина жана Испания курамалары бар.