Өкмөткө отоо чөп баскан жайыттарды калыбына келтирүү тапшырмасы берилди

Жайыттарга тийиштүү мыйзамдын аткарылышы боюнча өкмөт 7-декабрда парламенттин Агрардык саясат, суу ресурстары, экология жана аймактык өнүгүү комитетинин жыйынында маалымат берди.

Айыл чарба жана мелиорация министринин орун басары Жаныбек Керималиевдин билдиришинче, азыркы учурда 454 айыл аймагында Жайыт пайдалануучулар бирикмелери түзүлүп, анын аткаруу органы катары Жайыт комитеттери иштеп жатат. Быйылкы жылдын 10 айында жайыт пайдалануучулардан жайыт акысы үчүн 92 миллион сомдон ашуун каражат топтолуп, анын 15 миллион сомго жакыны жер салыгынын эсебине которулган.

Жыйынтыгында өкмөткө деградацияга учураган жана отоо чөп баскан жайыттарды калыбына келтирүү боюнча тиешелүү иш-чараларды кабыл алуу, талаш болуп жаткан жайыттардын чек араларын аныктап, мамлекеттик каттоодон өткөрүү боюнча чараларды көрүү тапшырмаларын берүү чечими кабыл алынды.