Кыргыз спортчусу Дастан Шаршеев Беларуста өткөн тайбокс боюнча мелдеште Дүйнөнүн 5 жолку чемпионун утту (фоторепортаж)

4-декабрда Минск шаарында (Беларусь) кикбокстун К-1 эрежеси, муай-тай жана эрежесиз эр уруш боюнча мелдеш болуп өттү. Мелдешке Беларусь, Орусия, Украина, Азербайжан, Польша жана Кыргыз Республикасынын спортчулары катышты.

Мелдештин расмий сайты маалымдагандай, 6-ирет өтүп жаткан мелдеште бир канча беттеш орун алды. Муай-тай боюнча күндүн башкы беттеши беларустук мушкер, Дүйнөнүн 5 жолку чемпиону Юрий Сацук менен кыргыз мушкери, Азия жана Евразия чемпиону Дастан Шаршеевдин ортосунда болду. Жыйынтыгында Дастан 2-раундда атаандашын нокаут менен жеңди.

"Шаршеев үчүн бул беттеш чоң мааниге ээ эле. Себеби спортчу 1 жыл мурун өзүн көргөзүүгө чоң мүмкүнчүлүк жаралганын, бирок анда утулуп калганын айткан. Ушундан кийин анын карьерасында кыйынчылыктар болду. Ал Минск шаарында Юрий Сацукту утту, эми ал рейтингде алдынкы саптарга жылып, карьерасын уланта алат",- деп жазат мелдештин расмий сайты.