Гүлчөдө аскердин өз өмүрүнө кол салганы боюнча жаңы версия пайда болду

Гүлчөдө асынган абалда табылган аскердин өлүмү тууралуу жаңы версия пайда болду. Маркумдун туугандары SUPER.KG порталына кайрылып: "КРнын Куралдуу күчтөрүнүн Башкы штабы өзүн акташ үчүн "аскер апасынын карыздары үчүн көп иштеген" деген жалган маалыматты таратып жатат",- дешти.

"Маркумдун денесин экспертизада сойдурушкан эмес. Анын денесинен аскердик өтүк менен тепкилегенден калган издер байкалган. Бизге жеткен маалыматтар боюнча, чогуу иштеген аскерлер аны басмырлап, акча талап кылышчу экен. Мындан тышкары ал бир күнү рациянын антеннасын сындырып алыптыр. Мындан улам аскер кызматкерлери аны катуу коркутушкандыктан, ал барып асынып алган",- дешти маркумдун туугандары.

"Анын апасы менен мамилеси жакшы болгон. Бир жолу апасынан карызга 2 миң сом сураган. Акча жок болгондуктан, апасы "Азырынча акча жок, көп жерден карыз алганбыз. Сен иштеп жатасың, тапкан акчаң өзүңө да жетпейт, үйгө да алып келбейсиң" деп жооп берген. Ал эми Башкы штабдын жетекчилери журналисттерге ушуну гана билдиришүүдө. Ал апасы менен урушкан эмес",- деп түшүндүрүштү туугандары.

"Жакында апасы арыз менен тиешелүү мекемеге кайрылганы жатат. Маркумдун артында апасы жана эки иниси калды. Үй-бүлөсү Гүлчөдөгү үйдө жашачу. "Аскер өзү асынып алган" дешип, анын үй-бүлөсүнө эч кандай компенсация берилбейт экен",- деп билдиришти маркумдун жакындары.

Эске салсак, 1-декабрда Гүлчө айылында 24 жаштагы аскер кызматкери асынган абалда табылган. Алай райондук аскер комиссариаты аны 2014-жылдын жазгы чакырылышында кабыл алган. Ал аскер кызматын келишимдик негизде өтөп жүрчү. Бүгүнкү күндө Ош прокуратурасы кызматтык иликтөө иштерин жүргүзүүдө.

КРнын Куралдуу күчтөрүнүн Башкы штабынын өкүлү Бакыт Жапаров: "Гүлчөдө асынган абалда табылган аскердин өлүмү үй-бүлөлүк кырдаалга байланыштуу болгон",- деген. "Аскердин апасы анын акча которула турган банк картасын өзүнө алып алган жана акчасын да өзү алып турган. Апасы учурда "дооматым жок" деп жазып берди. Иликтөө бүткөндөн кийин гана жыйынтык чыгат”,- деген Жапаров.