Базар-Коргондо таежеси 7 жашар жээнин таяк менен сабап өлтүрдү

Базар-Коргондо 46 жаштагы таежеси 7 жашар жээнин таяк менен сабап өлтүрдү. Бул тууралуу SUPER.KG порталына ИИМдин басма сөз катчысы Олжобай Казабаев билдирди. Анын айтымында, окуя 7-декабрь күнү кечинде болгон.

“Катуу сабалган кыз окуядан жарым саат өткөн соң ооруканага “Тез жардам” кызматы менен жеткирилген. Бирок эртеси күнү эртең менен каза болуп калган. Бул боюнча укук коргоо органдарына кабарланып, ыкчам иликтөө иштеринин жыйынтыгы менен 7 жашар К.Т. аттуу кызга Ы.И. аттуу таежеси кол көтөргөнү белгилүү болду. Кармалган аялдын айтымында, жаш кыз тентектигинен улам ошол күнү сабалган”,- дейт Олжобай Казабаев.

Атайын дайындалган экспертизанын жыйынтыгы 10 күндөн кийин белгилүү болот. "Ал эми эксперттер алгачкы текшерүүлөргө таянып, каза болгон кыздын колунда, бутунда эски көк алалары бар экенин билдиришти. Таежеси учурда убактылуу кармоочу жайга киргизилип, иликтөө иштери жүрүүдө. Бул окуяга күбө болгон бардык адамдар суракка алынышты. Шектүү аял эми 5 жылдан 10 жылга чейин эркинен ажырашы мүмкүн.

Каза болгон кыздын апасы 5 жашар кызы менен Базар-Коргондо турат. Алардан башка дагы эки баласы балдар үйүндө тарбия алат. Жолдошу Орусияда эмгектенет экен. Белгилүү болгондой, жашоонун кыйын кырдаалына учураган үй-бүлөнүн апасы балдарын бага албай, аларды балдар үйүнө жана тууганына берген экен. Кичүү кызы менен начар шартта жашап келгени аныкталды”,- деди Казабаев.