Ошто Камчы Көлбаевдин уюшкан кылмыш тобунун жалганчы мүчөсү эми улгайган аялды алдады

Ошто Камчы Көлбаевдин уюшкан кылмыш тобунун 43 жаштагы мүчөсү Абдимажит Исаков дагы кармалды. Бул тууралуу бүгүн, 10-декабрда ИИМдин басма сөз кызматы жарыялады.

Маалыматка ылайык, 22-октябрда милицияга 55 жаштагы аял кайрылып, 2014-жылы өзүн Абдимажит деп тааныштырган адам анын ишеничине кирип 210 миң сомун ээлеп алып, дайынсыз жоголгонун айткан. "Бул факт боюнча "алдамчылык" беренесинин негизинде кылмыш иши козголуп, кылмышка шектүү издөөгө алынган. Ал кармалып, убактылуу кармоочу жайга отургузулган. Тергөө амалдарынын жүрүшүндө Исаковдун буга чейин бир нече жолу соттолгону жана Камчы Көлбаевдин уюшкан кылмыш тобунун мүчөсү экени аныкталган",- деп жазылат маалыматта.

Эскерте кетсек, быйыл 10-сентябрда А.Исаков "элдин ишеничине кирип, алдоо жолу менен жарандарга материалдык зыян алып келген" деген шек менен кармалган эле.