"Акыйкатчынын шайланбай калышы трагедия эмес" деди спикер Жээнбеков

"Акыйкатчынын шайланбай калышы трагедия эмес",- деди спикер Асылбек Жээнбеков бүгүн, 10-декабрда Жогорку Кеңеште. Жээнбеков акыйкатчы кызматына эми жаңы талапкерлер сунуш кылына турганын айтты.

"Сунушталган талапкерлер зарыл болгон добушту ала албай калгандан кийин шайлоонун жыйынтыгы жокко чыгарылып, кайрадан 14 күндүн ичинде жаңы талапкерлердин арызын кабыл алып, 30 күндөн кечиктирбей акыйкатчыны шайлашыбыз керек. Жогорку Кеңеш 30 күнгө жетпей акыйкатчыны шайлап берет деген ишеничтемин",- деди Жээнбеков.

Айта кетсек, аталган кызматка "Ата Мекен" фракциясы Гүлгаакы Мамасалиева, Бакыт Рыспеков жана Турсунбек Акундун, КСДП Гүлнара Жамгырчиеванын, "Өнүгүү-Прогресс" Мурат Жетимишбаевдин, "Республика-Ата Журт" Атыр Абдрахматованын, "Бир бол" Нурланбек Жээналиевдин, "Кыргызстан" фракциясы Канатбек Турганбековдун талапкерлигин көрсөткөн. Аталган кызматка ат салышкандар өз программалары менен тааныштыргандан кийин Мурат Жетимишбаев талапкерлигин алып салган.

1-турдун жыйынтыгында Гүлгаакы Мамасалиева 28, Атыр Абдрахматова 23 добуш алып, 2-тур жарыяланган. 2-турда Абдрахматова 34 добуш алып, 3-турга өткөн. Соңку турда анын талапкерлигине 46 депутат "макул", 69 депутат "каршы" деп добуш берип, шайланбай калды. Добуш берүү жашыруун жүргүзүлүп, депутаттар саат 21:15ке чейин иштешти.