"Turkvizyon" Эл аралык сынагынын жеңүүчүсү Жийдеш Идирисова: "Жеңишти укканда күйөрмандарыбыз сыяктуу эле биз да толкунданып, сүрдөп, көзүбүзгө жаш алдык"

Кыргыз Республикасы биринчи жолу "Turkvizyon" Эл аралык сынагында жеңишке жетти. Жеңишти сынакта кыргыз жеринин намысын коргогон Жийдеш Идирисова алып келди.

Бүгүн, 23-декабрдагы маалымат жыйынында ырчы Түркиядагы кыргыз жарандары тарабынан көрсөтүлгөн колдоо күчтүү болгонун белгилеп өттү.

"Түркиядагы мекендештерибиз колдоп келишти. Залга киргенде өлкөбүздүн туусу биринчи көзгө урунду. Сынакка төрт ай даярдандык. Ырдын сөзүн жазып берген Кыялбек Урманбетовго ыраазычылык билдирем. Бий, аранжировкасын даярдадык. Болгария, Румыния, Казакстандан келген ырчылардын вокалы күчтүү экенин байкадым.
Бул бир гана менин эмес, жалпы кыргыз жерибиздин жеңиши деп ойлойм. Жеңгенибизди укканда күйөрмандар кандай кабыл алса, биз да сүрөп, толкунданып, көзүбүзгө жаш алдык. Түркияда даярдык учурунда башка катышуучулар биздин аткаргандарыбызды көрүп мактап жатышты",- деди Жийдеш Идирисова.