Кара-Көлдө 11 жашар окуучу кызды зордуктап, муунтуп өлтүргөн кылмышкер өмүр бою эркинен ажыратылды

Кечээ, 28-декабрда Жалал-Абад облусунун Кара-Көл шаарында 11 жаштагы кыздын өлүмү боюнча шектүүнүн ишин шаардык сот жабык эшик артында карады. Жыйынтыгында айыпталуучу А.Ызаков өмүр бою эркинен ажыратылды. Маалыматты SUPER.KG порталына Кара-Көл шаардык сотунан тастыкташты.

Эскерте кетсек, 2015-жылдын 25-сентябрында саат 15:20 чамасында Кара-Көл шаарынын “Энергетик” сейил багынын чыгыш тарабынан жип менен муунтулуп, кийимдери чечилген абалда, киши колдуу болгон Кара-Көл шаарынын 2004-жылы туулган тургуну, Ч.Түлөбердиев атындагы №2-орто мектебинин 6-классынын окуучусунун жансыз денеси табылган.

26-сентябрда жүргүзүлгөн ыкчам иш-аракеттердин натыйжасында кылмышка шектүү катары мурда 11 жолу ар түрдүү кылмыштарды жасагандыгы үчүн соттолгон Токтогул районунун 35 жаштагы тургуну кармалган.