Министрдин орун басары Жаңы жыл күнү электр энергиясы өчүрүлбөй турганын айтты

2016-жылдын 2-январынан тарта электр энергиясына болгон чектөөлөр өлкө боюнча кайра киргизилиши мүмкүн. Муну бүгүн, 29-декабрда маалымат жыйындын жүрүшүндө экономика министринин орун басары Айбек Калиев билдирди.

Анын айтымында, Токтогул ГЭСинин кубаттуулугу авариянын кесепетинен 600 мегаваттка төмөндөдү. "Кубаттуулук 2 эсе азайды. Мындан улам киргизилген чектөөлөр болду. Бүгүн чектөөлөр Жаңы жыл майрамына байланыштуу убактылуу токтотулду. 2-январдан баштап биз чектөөлөр боюнча маселени карап баштайбыз, анткени акыркы 40 жылдан бери бизде кабелдер аварияга учураган эмес болчу. Учурда күнү-түнү адистер бул маселе боюнча экспертиза өткөрүп жатышат”,- деди Калиев.

Мындан тышкары ал Токтогул ГЭСинде 40 жылдан бери иштеп жаткан кабелдик линиялар дүйнө жүзүндө эч жерде чыгарылбаганын баса белгиледи. "Кечээ болгон авариянын кесепетинен кабелдердин биринде май катуу аккан. Ал май дагы Японияда гана чыгарылат",- деп кошумчалады чиновник.