Улуттук гвардиядагы кырсык: Аскер кызматкерлерине ок чыгарган кароолчуга 4 айып тагылды

Кечээ, 28-декабрда Улуттук гвардиянын №714-аскер бөлүгүндө аскер кызматкерлерине ок чыгарган кароолчу Мейилкул уулу Аскар кармалды. Бул тууралуу SUPER.KG порталына Башкы прокуратурадан билдиришти.

Маалыматка ылайык, аталган факт боюнча Кылмыш-жаза кодексинин "адам өлтүрүү", "кызматтык абалынан пайдалануу", "кызматтык ыйгарым укугунан аша чабуу" жана "шалаакылык" беренелеринин негизинде кылмыш иши козголгон.

Саламаттыкты сактоо министрлигинен SUPER.KG'ге кабарлашкандай, кырсыктан улам жарадар болуп, оор абалда ооруканага жаткырылган Матислам Мариповдун абалы учурда орто оор деп бааланууда. "Анын төшүнөн ок чыгарыла элек. Окту чыгаруу боюнча операция консилиумдун чечими менен өткөрүлөт. Азырынча бул операция качан өтөрү белгисиз",- дешти министрликтен.

Эскерте кетсек, кечээ, 28-декабрда болжол менен саат 03:00дө Улуттук гвардиянын Бишкек шаарынын Лев Толстой көчөсүндө жайгашкан №714-аскер бөлүгүндө кароолчу Мейилкул уулу Аскар (1996-жылы туулган) постко кетип баратканда, ошол аскер бөлүгүндө кызмат кылган эки жигит Асылбек уулу Азамат (1997-ж.т.) жана Матислам Марипов (1995-ж.т.) ага кол салганга аракет жасашкан. Кароолчу коркуп кетип аларга карата ок чыгарган. А.Азаматтын ичине бир ок, М.Мариповго үч ок тийген. Саат 07:00 чамасында А.Азамат ооруканада көз жумган. Ал эми жарадар болгон М.Мариповдун абалы оор, бирок туруктуу деп бааланууда. Ага жалпысынан 3 ок тийген: колуна, ичине жана төшүнө. Эки ок этти тешип өткөн, үчүнчүсү төшүндө калган. Ок дем алуу органдарына тийген эмес.