Өмүрбек Текебаев: "Кыргыз Республикасы өз тагдырын өзү чеччү эркин жана демократиялык мамлекет экенин тастыктады"

"Ата Мекен" партиясынын лидери Өмүрбек Текебаев бүгүн, 30-декабрда мамлекетибиздин жарандарын Жаңы жыл майрамы менен куттуктады. Куттуктоодо булар айтылат:

"Урматтуу мекендештер!

Мына, 2015-жыл да аяктап, бир нече көз ирмемден кийин 2016-жыл кирип келет. Үстүбүздөгү жыл өлкөбүздүн өнүгүшүндөгү маанилүү тарыхый жыл болуп калды. 2015-жылдын 4-октябрындагы шайлоодо элибиз өнүгүүнүн тарыхый жолун тандап алды жана мамлекетти, коомду башкаруунун парламенттик формасынын туура экенин бекемдеди. Учурдагы дүйнөлүк каатчылыктарга карабастан, элибиз жогорку жоопкерчилик жана терең түшүнүү менен мамлекетибиздин жана калкыбыздын келечеги үчүн өз тандоосун жасады деп ишенимдүү айтууга болот.

2015-жылды аяктап жатып, калкыбыз негизги жана маанилүү максатка жетишти, Кыргыз Республикасы бүгүн өзүнүн тагдырын жана келечегин өзү чече алган туруктуу, эркин жана демократиялык мамлекет экенин дагы бир жолу тастыктады.

Аяктап бараткан жылдын жыйынтыгын чыгарып жатып, чынчылдык, акыйкаттык, ар-намысты туу туткан биздин жалпы идеяларыбызды түшүнүп, колдогону үчүн жалпы элибизге ыраазычылык билдиргим келет.

2016-жылда ар бир кыргызстандыктын тагдырына мамлекеттин жоопкерчилигин күчөтүү менен алдыга коюлган максаттарды жана калкты социалдык жактан коргоо боюнча жигердүү ишибизди улантабыз. Биз мыйзамдын үстөмдүгү, демократиялык коомго социалдык багыт берүүчү өнүгүүнүн бекем негизи болгон теңдик жана акыйкаттык үчүн күрөшөбүз. Жаңы жылда экономикалык өнүгүүнүн, социалдык көйгөйлөрдү чечүүнүн, аймактарды динамикалык өнүктүрүүнүн негизинде калктын жашоо-турмушун сапаттуу жакшыртуу багытында көптөгөн иштерди аткарууну максат кылып жатабыз. Биз эң чечкиндүү жана масштабдуу пландарды ишке ашырууга милдеттүүбүз. Ар бирибиздин канчалык үзүрлүү, чыгармачыл жана жемиштүү иштегенибизден биздин өлкөнүн өнүгүшү жана ар бир кыргызстандыктын жыргалчылыгы көз каранды.

Урматтуу мекендештер!

Келе жаткан Жаңы жылыңыздар менен! Жаңы жыл ар бир үй-бүлөгө жетишкендиктерди, тынчтык жана ынтымак алып келсин, баарыңыздарга ден соолук жана бакыт-таалай каалайм. 2016-жылыбыз жаңы ийгиликтер ишке ашкан, үмүт-тилектерибиз кабыл болгон жылдардан болсун.

Дагы бир жолу майрамыңыздар менен, урматтуу кыргызстандыктар!"