Ырчылар Акбар, Cултан жана Мирбек тандалган ырларын ырдап, элге жаңы жылдык маанай тартуулашты (фоторепортаж)

Бишкектеги Кожомкул атындагы Спорт Ордосунда 2016-жылдын эсебинен алгачкы чоң концерт өттү. Жаңырган жылдын биринчи күнүндө орун алган концерт "Достор" деп аталып, ырчы достор Султан Садыралиев, Акбар Сүйүнбаев жана Мирбек Иманбеков тарабынан эл назарына коюлду. Келген эл Спорт Ордосунун концерттик залынын 70 пайызын ээледи. Алгач достор чогуу 3-4 ырды аткарып, андан кийин бирден сахнага чыгып, жалгыз-жалгыздан обон созушту. Күндүн каармандары ырларды жандуу үн менен обого жаңыртып, жандуу музыканын коштоосунда ырдашты. Бул күнү 3 гана ырчы конок катары ырдаса, "Ак-Өргө City`нин" куудул жигиттери элге күлкү тартуулашты.

30 жашка чыккан бул жигиттер мындан 10 жыл мурун укмуштуудай атактуулукка жеткени эсиңиздерде болсо керек. Ооба, анда алардын бирөөнүн эле концертинде Спорт Ордосуна эл батпай калчу. Ошол кезде үч ырчы биригип концерт берсе, Спорт Ордосун мындай коюңуз, башкы стадионго элди батыруу кыйын болуп калмак. Андан бери көп нерсе өзгөргөнүн ырчылар өз сөздөрүндө айтып өтүштү. Анда телефонго видеого тартып, сахнага жулунган күйөрман кыздар бүгүн татыктуу энелик бакытка жулунган келин болушкан. Баягы жалтырактарга кызыгып, бул ырчыларды күйөрман туткандар жыл санап азаюуда. Ошол эле учурда жыл санап анык күйөрмандар гана иргелип жатат. Алардын мурункуга салыштырмалуу аз келгенинин биринчи себеби ушул. Экинчи себебин Жаңы жыл майрамына байланыштырууга болот.