Атайын долбоордун негизинде дыйкандарга жашылча-жемиштердин үрөнү берилмекчи

Гранттык долбоордун негизинде дыйкандарга эгин жана жашылча-жемиштердин үрөндөрү берилмекчи. Тийиштүү долбоор 15-январда парламентте "Өнүгүү-Прогресс" фракциясынын жыйынында талкууланып, чечим кабыл алынды.

Маалыматка таянсак, япониялык фонд тарабынан каржыланып, 2018-жылга чейин белгиленген долбоордун суммасы 2 миллион 800 миң доллар. Максаты - айыл жергесиндеги калктын аярлуу катмарына көмөк көрсөтүү, жакырчылыктан чыгуу. Долбоордун алкагында дыйкандарга эгиндердин жана жашылча-жемиштердин үрөндөрү сатылып берилип, кайра акчалай же үрөн түрүндө кайтарылып, кийинки жылы кайра башка дыйкандарга берилип, уланмакчы.

Депутаттар долбоордун алкагында айдап-себүү маалыматын камтып чыгарылган китепчелер дыйкандарга жеткиликтүү тилде болушу керектигин, долбоордун аткаруучулары жергиликтүү үрөн чарбалары менен кызматташуусу зарылдыгы айтылды. “70-80 центнер түшүм алынат деп берилген эгин үрөндөрүнөн иш жүзүндө андай түшүм алынбай калса, кимдир бирөө жооп бериши керек”,- дейт депутат Мирлан Бакиров.

Жыйынтыгында дыйкандардын өтүнүчү менен өндүрүлгөн өнүмдөрдү сатууга көмөктөшүү, долбоорду кеңири жайылтуу боюнча өкмөткө тапшырма берүү чечими кабыл алынды.