Жалал-Абадда милициянын майору "курал-жарактарды террордук уюмдарга саткан" деп шектелүүдө

Жалал-Абад облустук ички иштер башкармалыгынын курал-жарактарды сактоо, берүү жана атуучу куралдарды каттоо бөлүмүндө ага инспектор болуп эмгектенген Б.Райымбеков "курал-жарактарды террордук уюмдарга саткан" деп шектелүүдө. Бул тууралуу бүгүн, 21-январда УКМКнын басма сөз кызматынан билдиришти.

УКМК 14-январь күнү Жалал-Абад облусунда калктуу конуштардын биринен табылган гранатомёт жана 6 миңге жакын ок-дарылар террордук уюмдардын бирине сатуу үчүн бекитилгенин кабарлады. Белгилүү болгондой, кылмышка шектүү учурда камакка алынып, иликтөө иштери жүргүзүүдө.

Эске салсак, бул факт боюнча жакынкы аралыкта Сириядагы согуштук аракеттерге катышып келген адам кармалган. Иликтөө иштеринин алкагында анын 2015-жылдын июль айында жок кылынган казакстандык Т.Жумагулов жана Ж.Амиров башында турган террордук топко катыштыгы бар экени аныкталган.