"Өзгөндө асынып өлдү" делген Шайырбектин жакындары ага үстөмдүк болуп келгенин айтышты

Өзгөн районунун Шералы айылында 10-январда массалык мушташ катталып, андан 5 күн өткөндөн кийин окуя болгон жерден бойго жеткен жигиттин даракка асылган жансыз денеси табылганын кечээ Ош облустук ички иштер башкармалыгынын басма сөз катчысы Жеңиш Ашырбаев билдирип, анын өлүмү массалык мушташка тиешелүү эместигин кошумчалаган.

Бүгүн, 22-январда маркумдун жакындары SUPER.KG'ге кайрылып, ага үстөмдүк болуп келгенин айтышты.

"Массалык мушташка маркум Шайырбек да катышкан. Мушташ Дөң-Булак айылынан 17 чакырым алыстыктагы Шералы айылында болгон. Аны баштаган Хонда Аккорд үлгүсүндөгү унаанын ээсинин атасы Алмаз Жолдошов Портердеги балдарга карата арыз жазып, аларды каматып салган. Ал эми Шайырбек белгисиз себептер менен камалбай калган. Шайырбек камалган балдардын ата-энелери менен биргеликте чоң суммадагы акча чогултуп, камактагы досторун үй камагына чыгарган.

Балдар үй камагына чыккандан тарта Алмаз Жолдошов аларга үстөмдүк кылып, бир тууган таякеси подполковник Бердигул Караевге таянып "өлтүрүп коём" дегенге чейин барган. Анысы аз келгенсип Бишкекте спорт менен машыккан 4 инисин чакырып, Шайырбекти тынымсыз издетип турган. 14-январь күнү маркумдун Шаршен аттуу аяш атасына барып "аны кантип жазалашты ойлоп койдум" деп кеткен экен",- деди Шайырбектин жездеси Данияр Шабданов.