"ЖАМКтын борбордук аппаратынын имаратында эч ким өлтүрүлгөн эмес" дейт Жаза аткаруу кызматынын өкүлү

"Жаза аткаруу мамлекеттик кызматынын жетекчиси жана анын орун басары №50-абактан кылмышкерлердин качууга даярданып жатканын билип, бирок чара көргөн эмес" деп маалымат тараткан ЖАМКтын отставкадагы ардагери Эрнст Исаевди аталган кызмат сотко берет. Бул тууралуу бүгүн, 26-январда ЖАМКтын басма сөз кызматынын өкүлү Александр Никсдорф билдирди.

"Бүгүн маалымат жыйынында Эрнст Исаев билдиргендей ЖАМКтын борбордук аппаратынын имаратында эч ким өлтүрүлгөн эмес. Бул кресло талашуу кадамы, Исаев бирөөнүн кызыкчылыгын көздөөдө. Менин билишимче, ал бүгүн маалымат жыйынына жабырлануучулардын жакындарын жана туугандарын да чакырган. Кечээ ЖАМКтын жетекчиси Эрнст Исаевди чакырткан болчу, ал жерден "Мен сага качан антип айттым эле?" деген суроосуна жооп бере алган жок. Ал болгону "эртең билесиңер" деп жооп кайтарган", - деди Никсдорф.

"Исаев өзү ЖАМКта жетекчи болуп жүргөн кезде адамдар өлтүрүлгөнүн унутуп калганбы? Ал азыр бийликте эмес, ошон үчүн ал кеңеш бергенге өткөн",- деп кошумчалады Никсдорф.

Ал эми "кармалган кылмышкерлердин биринин артынан бири өлгөнү шек жаратып жатат..." деген суроого ЖАМКтын өкүлү ага стресс, жүрөк оорулары, качуу, башка адамдардын өлүмү себеп болушу мүмкүн экенин айтты.