Урмат Аманбаева ооруканада болгондугуна байланыштуу сот отуруму дагы жылдырылды

Бүгүн, 26-январда Бишкек шаардык сотунда коррупция боюнча айыпталган Жогорку Кеңештин мурунку депутаты Урмат Аманбаеванын соту өтмөк. Айыпталуучу учурда ооруканада болгондуктан, отурумга келе алган жок. Ишти карап жаткан судья буга байланыштуу отурумду башка күнгө жылдырды. Бирок кайсы күнгө жылдырылганын белгилеген жок.

12-январда да судья Аманбаеванын ден соолугуна байланыштуу отурумду 26-январга жылдырып, анда да жакшы боло албаса, февраль айында карала турганын айткан.

Айта кетсек, бүгүн шаардык сотто Октябрь райондук сотунун чечими боюнча
У.Аманбаеванын апелляциясы каралмак.

Экс-депутат Урмат Аманбаевага Башкы прокуратура тарабынан кылмыш иши ачылган. "Коррупция" беренеси менен айыпталып жаткан мурдагы депутат мамлекетке 17 миллион 263 500 сом зыян келтиргени айтылган. Ал Ош облусундагы Кургак учук менен күрөшүү борборунун башкы эсепчиси болуп турганда мыйзамсыз иштерди жасаганы маалымдалган. 13-ноябрда Октябрь райондук соту Урмат Аманбаеваны 9 жылга эркинен ажыратып, мүлкүн конфискациялоо боюнча өкүм чыгарган. Аманбаева өзүнө козголгон кылмыш ишин негизсиз деп эсептеп жана тагылып жаткан айыптарга макул эместигин айткан.