Жогорку Сот бүгүн Канжар Кадыралиевдин баш коргоо чарасын карайт

Бүгүн, 27-январда Жогорку Сот бир нече беренелер боюнча айыпталган прокуратуранын мурунку кызматкери Канжар Кадыралиевдин баш коргоо чарасына байланыштуу маселени карайт. Бул тууралуу SUPER.KG порталына айыпталуучунун жактоочусу Икрамидин Айткулов билдирди.

Буга чейин Канжар Кадыралиевге бир нече операция жасалганы айтылып, ден соолугуна байланыштуу соттун чечими менен үй камагына чыгарылган.

Эске салсак, Башкы прокуратура 2014-жылдын 30-сентябрында, 14-ноябрында жана 5-декабрында Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен талап кылуу” беренелери боюнча кылмыш ишин козгоп, ээлеген кызматынан бошоткон. Андан соң Ош шаардык соту аны камакка алуу чечимин чыгарып, издөө жарыялаган. 2015-жылдын 26-мартында Кадыралиев Башкы прокуратурага өз эрки менен келген, андан кийин ден соолугуна байланыштуу ооруканага жаткырылганы белгилүү болгон.