Бишкекте өзүн өзү өрттөп каза тапкан жигиттин жакында эле атасы кайтыш болуп, апасы ооруп жаткандыгы аныкталды

Бишкекте өзүн өзү өрттөп каза тапкан жигит жакында эле атасынан айрылып, апасы ооруп жаткандыгы аныкталды. Бул тууралуу SUPER.KG порталына бүгүн, 1-февралда Бишкек шаардык ички иштер башкы башкармалыгынан билдиришти.

Иликтөө иштеринин алкагында маркумдун апасы төмөнкүлөрдү айтып берген: "30-январь күнү 24 жаштагы уулум көптөн бери токтоп турган унаасын айдайм деп, бензин алып келүү үчүн Фучик көчөсүндө жайгашкан май сатуучу жайлардын бирине кеткен. Уулумдун жүрүм-турумунан шектүү эч нерсе деле байкаган эмесмин".

Ал эми өзүн өрттөгөн жигит жолдо келатып сатып алган 10 литр бензинди өзүнө чачып, өзүн өрттөп салган. Анын денесинин 90 пайызы күйүп, 3-4-даражадагы күйүктөрдү алган. 24 жаштагы Андрей Панин оор абалда өзүнө келбей жатып 31-январь күнү саат 04:20 чамасында 4-Шаардык ооруканада каза болгон.

Бул факт боюнча курамында кылмыштын далилдери жок болгондуктан, кылмыш иши козголгон эмес.

Айта кетсек, 30-январда Ленин жана Фучик көчөлөрүнүн кесилишинде 24 жаштагы жигит өзүнө бензин куюп өрт чыгарган.