Нарымбаев менен Коркмазовдун иши боюнча кийинки соттук отурум 13-февралга белгиленди

Коррупция боюнча айыпталып жаткан экс-чиновник Данияр Нарымбаев жана Хажимурат Коркмазовдун иши боюнча кийинки соттук отурум 13-февралга белгиленди. Бул тууралуу бүгүн, 2-февралда SUPER.KG порталына Бишкек шаардык соттун басма сөз катчысы Гүлмира Боталиева билдирди.

Кечээ, 1-февралда болгон сот отурумунда экс-мэр Нариман Түлеевдин уулу Нариман уулу Бакыт жана Жогорку Кеңештин экс-депутаты Элмира Иманалиеванын жардамчысы Ольга Плотникова суракка алынган. Бул иш боюнча соттук отурум 13-февралда улантылмакчы.

Эске салсак, Коркмазов 2015-жылдын 15-июлунда Бишкектин мурунку мэри Нариман Түлеевдин кызынан 100 миң доллар пара алып жатканда кармалган. Кылмыш үстүнөн кармалган депутат тергөө учурунда бул ишке президенттик аппараттын мурунку башчысы Д.Нарымбаевдин катышы бар экенин билдирген. 22-июлда Нарымбаевге айып тагылып, УКМКнын СИЗОсуна убактылуу камакка алынган. Прокуратура жүргүзгөн тергөөнүн жыйынтыгында Данияр Нарымбаевге “пара алуу”, “кызмат абалынан кыянаттык менен пайдалануу”, ал эми Хажимурат Коркмазовго “пара алуу” беренеси боюнча айып тагылган.