Арменияда мыйзамсыз чек арадан өтүүгө аракеттенген кыргыз жараны 4 айга эркинен ажыратылды

Армения менен Түркиянын чек арасынан мыйзамсыз өтүүгө аракеттенген 19 жаштагы кыргыз жараны кармалып, 4 айга камакка алынды. Бул тууралуу жергиликтүү маалымат каражаттары жазып чыгышты.

Маалыматка ылайык, Арабжон Байталиев 2015-жылы 1-сентябрь күнү Түркиянын аймагынан чыгарылган. Ал кайра Түркияга кайтуу максатында 23-сентябрь күнү Арменияга келген. "Армавир" чек ара тозотунан ал чек араны басып өтүүгө аракет кылып жаткан жеринен чек арачылар тарабынан кармалган. Тиешелүү органдарга өткөрүлүп берилип, ал 4 айга камакка алынган. 3 ай 20 күн камакта отурган А.Байталиев 10 күн аралыгында эркиндикке чыгарылмакчы. Анын жактоочусу билдиргендей, уулун тосуп алууга Арменияга анын апасы учуп келген.