Футбол боюнча Орусияда өтө турган "Конфедерация Кубогу-2017" мелдешинин эмблемасы тааныштырылды

3-февралда "Футбол боюнча Дүйнө чемпиондугуна 500 күн калды" деген аталышта салтанаттуу иш-чара болуп өттү. Анда 2017-жылы Орусияда өтө турган Конфедерация Кубогунун эмблемасы тааныштырылды. Бул тууралуу орусиялык басылмалар кабарлашты.

Маалыматка ылайык, аталган мелдеш 17-июнда старт алып, 2-июлда жыйынтыкталат. Биринчиликти Москва ("Открытие Арена" стадионунда), Санкт-Петербург ("Зенит Арена"), Казань ("Казань Арена"), Сочи ("Фишт") шаарларында өткөрүү пландалууда.

Кошумчалай кетсек, 4 жылда бир ирет уюштурулуучу Конфедерация Кубогу Дүйнө чемпиондугуна 1 жыл калганда өткөрүлөт. Анда чемпиондук үчүн 8 команда катышат: мелдешти өз өлкөсүндө өткөрө турган команда, дүйнөнүн учурдагы чемпиону, Азия, Латын Америка, Түндүк Америка, Европа, Африка, Океаниянын чемпиондору.

Азырынча мелдешке катыша турган 5 гана команда белгилүү. Алар: 2018-жылкы Дүйнө чемпиондугун өз үйүндө өткөрө турган Орусия курамасы, Дүйнө чемпиону Германия, Азия чемпиону Австралия, Латын Америкасынын чемпиону Чили жана Түндүк Американын чемпиону Мексика.