Сюрприздерге бай Данияр Эрматовдун концерти шаңдуу маанай менен аяктады

14-февралда Бишкек шаарында Кааба уулу Кожомкул атындагы Спорт Ордосунда жаштардын, өзгөчө кыздардын сүймөнчүгү болгон ырчы Данияр Эрматовдун Махабат майрамына карата сюрприздерге бай болгон эки бөлүктөн турган концерти аяктады.

Концертке келген көрүүчүлөрдүн саны арбын болуп, Спорт Ордосунун 80 пайызынан ашууну толду. Келгендердин басымдуу бөлүгү жаштар болушту. Кече ээси өз күйөрмандарына репертуарындагы ырларын тартуулады. Ошондой эле концертте Айпери Кубик кызы, Байэл, Асел Кадырбекова, Клара Алибекова, Нурмат Садыров, Дайыр Исмадияров, Айдана Дека, Алмаз Шаадаев, Чыңгыз Турдубеков жана кеченин башкы сюрпризи болгон казакстандык рэпер MC Сайлаубек катышты.
Көрүүчүлөр үчүн алгачкы сюрприз катары Нурмат Садыровдун боло турган концертине билеттер ойнотулду. Андан тышкары алып баруучу Бакыт Осмонканов көрүүчүлөрдү тамашага салып, аларды зериктирбей, "Моника Беллуччи" "Тамашоу" командасынын оюнчулары менен залды күлкүгө бөлөдү. Ал эми казакстандык рэпер MC Сайлаубек өзүнүн хит болгон "Follow me" жана "Beaze" аттуу ырларын аткарды. Кээ бир көрүүчүлөр кошо ырдашса, орто курактагылар таң калып отурушту.

Кеченин экинчи бөлүгүн Данияр Эрматов музыканттардын коштоосунда жандуу үн менен баштады. Алгач "Кечир мени" ырын тартуулап, көрүүчүлөрдү концерттин нугуна кайтарды. Анын жандуу үн менен ырдаганын уккан күйөрмандары аны коштоп отурушту. Концерттин бул бөлүгүндө ырчы бир кезде хит болгон Артык Саитов менен Сапар Эркебаевдин аткаруусундагы "Атага кат" аттуу ырды ырдап, көрүүчүлөрдүн арасында отурган атасын барып кучактап, элге тааныштырды. Андан соң сахнага Чыңгыз Турдубековду чакырып, анын гитарасынын коштоосунда кыргыз элине сиңип калган Рыспай Абдыкадыровдун "Издейм сени", Асанкалый Керимбаевдин "Сендей мага" аттуу ырларын аткарып, күйөрмандардын купулуна толо алды. Өзүнүн жеке концертин ырчы "Бийлейли ча-ча" ыры менен бийчилердин коштоосунда бүтүрдү.