"Бир мешок акча" тасмасында акча адамды толук өзгөртөрү, бирок адилеттүүлүккө дайым орун бар экени көрсөтүлгөн (фоторепортаж)

Бүгүн, 24-февралда Бишкекте "Бир мешок акча" деген аталыштагы тасманын бет ачары болду. Бүгүн алгачкы жолу кинотеатрда көрсөтүлгөн тасма эртеңден баштап көрүүчүлөрдүн назарына коюлат.

Комедия жанрындагы тасманын мазмунуна токтолсок, тасма карапайым турмушта жашаган, батирдин ижарасын бере албай кыйналган балдардын жашоосун чагылдырат. Алардын бири байдын уулу болгонуна карабай "өз күчүм менен курулуш ишканасын ачам" деген максатты көздөп, атасынын берген жардамдарын четке кагат. Экинчиси капчыктуу кызга ашык болуп жүрөт. Зор амбицияга, максатка ээ жигиттер ресторанда ашпозчу болуп эмгектенишет.

Бир күнү алар ресторандын таштандыларын төгүү үчүн чыгып, бир мешок акча таап алышат. Ошол күндөн баштап алардын жашоо образы, кулк-мүнөзү өзгөрө баштайт. Бир күнү алардын артынан кооптуу адамдар түшүп, акчаларын алып кетишет. Окуя күлкү, ый жана кызыктар менен коштолуп жүрүп отурат. Каармандар акчалуу турмушта аз убакыт жашап, анан кыйынчылык көрө башташат. Мунун баары турмуш сабактары экенин, атасынын баласына сабак болсун деп жасаган иши экенин алар кеч билишет.

Кошумчалай кетсек, тасмада режиссёрлук милдетти "Ак-Өргө City" тобунун жигиттери Рүстөм Аскенов менен Кубанычбек Курманбеков аркалашкан. Ушул эки жигит тасмада башкы ролду жаратып, күлкүгө толгон тасманын көркүн ачышкан.