Алмазбек Атамбаевге өлкөдөгү кендерди иштетүүнүн абалы боюнча маалымат берилди

Президент Алмазбек Атамбаев 25-февралда Геология жана минералдык ресурстар боюнча мамлекеттик агенттиктин директору Дүйшөнбек Зилалиевди кабыл алды.

Мамлекет башчы мекеменин азыркы иши, геологиялык-чалгындоо иштерин кеңейтүү, кендерди пайдалануу укугуна лицензия берүү, аукцион жана сынактарды өткөрүү боюнча маалымат укту.

Зилалиев өлкөдөгү ири тоо-кен ишканаларынын, анын ичинде былтыр ишке берилген "Бозумчак", "Талды-Булак-Сол-Жээк" жана "Иштамберди" алтын кендеринин иши тууралуу айтып берди. Өзү жетектеген мекеме пайдалуу кен казууну көбөйтүү үчүн тоо-кен өндүрүшүнүн кубаттуулугун көтөрүү жана сапатын жогорулатуу боюнча жаңы милдеттерди алып жатканын белгиледи.

Президент тоо-кен тармагына инвестицияларды тартуунун маанисин, ошондой эле кендерди пайдалануу укугуна ээ болуу үчүн өткөрүлүп жаткан сынактардын бардык баскычтарында ачыктыкты арттырып, антикоррупциялык иштерди күчөтүү зарылдыгын билдирди.