Кыргыз жеринен чыккан атактуу гандболчу Талант Дүйшөбаев Польша улуттук курамасына машыктыруучу болду

Кыргыз жеринен чыккан атактуу гандболчу, акыркы жылдары машыктыруучулукка өткөн Талант Дүйшөбаев Польшанын гандбол боюнча улуттук курама командасынын машыктыруучусу болуп дайындалды. Польшанын Гандбол федерациясынын расмий сайты кабарлагандай, келишимге 27-февралда кол коюлган. Келишим ушул жылдын сентябрь айында бүтөт.

Буга чейин бул кызматты ээлеп келген машыктыруучу кызматтан алынып, анын ордуна 2 талапкер сунушталган. Анын бири Т.Дүйшөбаев болуп, көпчүлүк анын талапкерлигин колдогон.

Жаңы кызматка шайланган машыктыруучуга жана улуттук курамага "Рио-де-Жанейро-2016" Олимпиадасына жолдомо алуу тапшырмасы коюлары турган кеп. Олимпиадага жолдомо берүүчү мелдеш 7-10-апрелде өтөт. Анда Польша курамасы Чили, Тунис жана Македония менен беттешет. Бул 4 команданын ичинен жеңишке жетишкен 2 командага жолдомо берилет.

Кошумчалай кетсек, Талант Дүйшөбаев 14 жашында СССРдин курама командасына кирген. Союз тараган соң ага Испаниядан сунуш түшүп, ошол өлкөнүн жарандыгын алган. "Барселона-1992" Олимпиадасында ал атайын курамга кирип, Олимпиаданын алтын медалын тагынган. Испания курамасы менен "Атланта-1996" жана "Сидней-2000" Олимпиадаларында коло медалдарды багындырган.