"Тамашоунун" "Ак калпак" кубогунда 1-орунду "Кыргыз двор" менен "Универсал" командалары бөлүштү (фоторепортаж)

Бүгүн, 4-мартта Бишкектеги Кааба уулу Кожомкул атындагы Спорт Ордосунда "Тамашоу" Лигасынын "Ак калпак" кубогу өттү. Бул кубокту утууга ат салышкан "Универсал", "Позитифф", "Кыргыз двор", "Жаштар" курама командалары өз таланттарын 6 сынак боюнча көрсөтүштү.

Алар "Саламдашуу", "Ким тапан?", видеосынак, "Сони плейстейшн" жана "Музыкалык үй тапшырма" сынактары боюнча саясатка, күнүмдүк турмушка, шоу-бизнеске жана башка темаларга байланышкан тамашаларды тартуулашты. Мындан тышкары командалар аркан тартыш оюну боюнча жеңүүчүлөрдү аныкташты.

Күлкү кечесин аталган долбоордун негиздөөчүсү Эрмек Нурбаев алып барды. Ал эми оюнчулардын тапкычтыгын жана тапандыгын “Супер-Инфо” гезитинин башкы редактору Эльвира Караева, ырчылар Омар жана Урмат Усенов, актриса Элина Абай кызы, "тамашоучу" Мурат Жалиев, режиссёр Рысбек Жабиров жана Москвадагы метродо аялды куткарган Марат Исаев баалады.

Калыстар тобу 1-орунду "Кыргыз двор" менен "Универсал" командаларына берди. Кийинки орундарда "Позитифф" жана "Жаштар" курама командалары жайгашышты.