"Үркүн" тарыхый тасмасын тартуу уланууда (фото)

Быйыл 1916-жылдагы улуттук боштондук көтөрүлүшкө 100 жыл болот. Тарыхый окуяга байланыштуу “Үркүн” тасмасын тартуу иштери уланууда. Бул тууралуу тасманын продюсери Мухтар Атаналиев SUPER.KG порталына билдирди.

"Кудайга шүгүр, бир айдан бери тартуу иштери жүрүп жатат. Кыш мезгилинде болгон окуяларды тартып бүттүк. Жергиликтүү тургундар да жардамын аябай, бирөөсү коюн, бирөөсү картошкасын көтөрүп келип, болгон жардамын берип жатышат.

Үркүн - бул биздин тарых, башыбыздан өткөн окуя. Андыктан кыргыз жаштары бул окуя элибиз үчүн оор сыноо болгонун, кыргыз эли татаал күндөрдү башынан өткөргөнүн билиши керек. Тарыхый тасма болгондуктан, бардык нерсени, мисалы, эл жашаган айылды, аскер гарнизонун, айтор, жүз жыл мурунку учурду кайрадан куруп чыгуу керек болууда. Албетте, бул да убакытты, түйшүктү талап кылат",- дейт Атаналиев.

"Үркүн окуясы тууралуу тасма тартуу идеясын ойлонуп жүргөнүмө көп убакыт болду. Буюрса, окуянын 100 жылдыгын утурлай сентябрь айларында тасма даяр болот деп ниет кылып жатабыз",- дейт тасманын продюсери.