Ошто 30 гектар жерди мыйзамсыз түрдө сатып жиберген экс-мэрдин үстүнөн козголгон кылмыш иши сотко жөнөтүлдү

Ошто мыйзамсыз түрдө 310 миң сомго бааланып жеке менчикке сатылып кеткен 30 гектар жер боюнча козголгон кылмыш иши аяктап, Ош шаардык сотуна жөнөтүлдү. Бул тууралуу 24-март күнү Башкы прокуратуранын басма сөз кызматынан билдиришти.

Маалым болгондой, аталган факт боюнча кылмыш иши 2015-жылдын 19-октябрында козголгон. Анда Ош шаарынын Жапалак айылдык кеңешинин муктаждыгын чечүү үчүн, өкмөттүн токтомуна ылайык, 30 гектар айыл чарба жерин калк отурукташа турган жерге которгону белгиленген. Ал 154 үлүшкө бөлүнүп, мектеп, бала бакча, дарыкана, ФАП, өндүрүш-өнөр жай комплекси жана башка керектүү инфраструктура салынмак. Бирок шаардык мэриянын, өкмөттүн, Жапалак айыл өкмөтүнүн жетекчилери, Ош шаарынын Архитектура жана мамлекеттик каттоо башкармалыгынын жогорку кызмат адамдары аталган жер тилкесин 310 миң сомго баалап, жеке менчикке сатып жиберишкен.

Бул боюнча шаардын экс-мэри Жумадыл Исаковго жана жогоруда аталган кызмат жетекчилерине карата КРнын Кылмыш-жаза кодексинин “коррупция” беренесинин негизинде кылмыш иши козголгон. Тергөөнүн алкагында аталган жер тилкеси 26 миллион 640 миң сомго бааланып, Ош шаарынын мэриясына кайтарылган.