Алмазбек Атамбаев чек ара маселеси чечилбесе, 3 айдан кийин Ташкентте өтүүчү саммитке барбай турганын айтты

Бүгүн, 24-мартта журналисттер менен жолугушуусунда Алмазбек Атамбаев Өзбекстанда өтчү Шанхай Кызматташтык Уюмунун саммитине барбай турганын билдирди.

"Эгер чек арадагы кырдаал азыркыдай кала берсе жана бизге карата ушул сыяктуу мамиле улана берсе, мен Ташкентте өтчү Шанхай Кызматташтык Уюмунун жыйынына кантип барам? Эл эмне деп ойлойт? Эл мени мындан кийин сыйлабайт",- деп аталган иш-чарага барбай турганын түшүндүрдү.

"Чек арадагы талаш жерлер күч менен чечилбеш керек. Өлкөбүздүн башчылары өзбек жетекчилеринин алдында тизелеп жүргөн күндөр артта калды! Эми мындай болбойт! Мен Кыргыз Республикасынын кызыкчылыктарын жана элдин талаптарын гана ойлойм".

Айта кетсек, Шанхай Кызматташтык Уюмунун саммити 2016-жылдын 23-24-июнунда Өзбекстандын борбору Ташкентте өтмөкчү. Аталган уюмга Казакстан, Кытай, Кыргыз Республикасы, Орусия, Тажикстан жана Өзбекстан кирет.