Ош. Акыркы беш күн аралыгында өз өмүрүнө кол салууга аракет кылуу боюнча 3 факт катталып, 14 жаштагы кыз каза болду

Ош шаарында 20-25-март аралыгында өз өмүрүнө кол салууга аракет кылуу боюнча 3 факт катталды. Натыйжада 14 жаштагы кыз каза болуп, экөө аймактык оорукананын жандандыруу бөлүмүнө жеткирилди. Бул тууралуу бүгүн, 25-мартта SUPER.KG`ге Ош ШИИБинин басма сөз кызматынан билдиришти.

Маалыматка ылайык, 20-март күнү 14 жаштагы кыз өз үйүнүн короосундагы сарайга асынып каза болду. Кыздын ата-энеси ал эмне себептен мындай кадамга барганын түшүндүрө алган эмес. Учурда иликтөө иштери жүрүп жатат. 22-март күнү 19 жаштагы М.А. аттуу кыз дары ичип, оорукананын жандандыруу бөлүмүнө жеткирилген. Кыздын жакындары ал дарыны кокустуктан ичип алганын билдиришкен, учурда териштирүү иштери жүрүүдө. Ал эми 23-мартта саат 10:35 чамасында шаардык оорукананын жандандыруу бөлүмүнө уксус ичип алган Жапалак айылынын 28 жаштагы тургуну түшкөн.

2015-жылы Ош облусунда 17 өзүн өзү өлтүрүү фактысы катталган. Алардын ичинен 14ү жаш балдар, иликтөө иштеринин алкагында 8 баланын ата-энеси коңшу өлкөлөргө иштегенге кеткендери аныкталган. Ал эми Ош шаарында былтыр 31 өз өмүрүнө кол салуу фактысы катталып, алардын бири жашы жете элек өспүрүм болгон.