"Москвада мекендештерин тоноп жүргөн" деп шектелип Кара-Кулжа, Өзгөн райондорунун тургундары кармалышты

Москвада кыргыз жарандарынын батирине кирип каракчылык кылган жаран кармалды. ИИМдин билдиришинче, 2-марттан 24-мартка чейин Москва полициясына азиат түспөлүндөгү жигиттин куралчан каракчылык кылып жүргөнү тууралуу көп кайрылуу түшкөн.

8-мартта Москвада жашаган кыргыз мамлекетинин жаранына 25 жаштардагы жигит менен кыз (өздөрүн күйөөсү жана аялы катары тааныштырып) кайрылып, үйүнө түнөтүүнү өтүнүшкөн. Үй ээси ичкери киргизгенден 15-20 мүнөттөн кийин кыз менен жигит чүмбөт кийишип, үй ээсин - 53 жаштагы аялды бычак менен коркутушуп 16 500 рубль акчасын, 20 000 рублдук планшетин, 3 500 рублдук эки телефонун алып кетишкен.

Ушундай эле даттануулар 13, 17-март күндөрү башка жарандардан да түшкөн. Полиция 29-мартта аталган кылмыштарга шектүү адамдарды кармады. Маалыматка таянсак, шектүүлөр: Ош облусунун Кара-Кулжа районунун 1993-жылы туулган тургуну С. уулу Э. жана Өзгөн районунун 1989-жылы туулган тургуну И.Н.

Шектүүлөрдүн жанынан пневматикалык тапанча, 6 даана уюлдук телефон, планшет жана башка буюмдар табылган. Учурда тергөө жүрүп жатат.