Өзгөндө чагылган түшүп, бир үй-бүлө зыянга учурады

Ош облусунун Өзгөн районунда чагылган түшүп, анын кесепетинен бир үй-бүлөнүн турак жайынын бир топ жери жараксыз абалга келди. Бул тууралуу бүгүн, 13-апрелде Өзгөчө кырдаалдар министрлигинин басма сөз кызматынан билдиришти.

Маалым болгондой, бүгүн таңкы саат 05:55 чамасында Өзгөн районунун Кызыл-Тоо айыл аймагындагы Эркин-Тоо айылынын Жээнали Жамантаев аттуу тургунунун турак жайына чагылган түшкөн. Чагылгандын кесепетинен үй ээсинин мончосунун шиферлери, турак жайынын айнектери сынып, муздаткычы жана электр эсептегичи жараксыз абалга келген.

Окуяны жеринен тактоо үчүн тиешелүү кызматкерлер жөнөп кетишкени маалым болду.