Бойдоктун бүтпөс убадалары, жубайлыкка алчу кызды издөө түйшүгү "Апа, быйыл сөзсүз үйлөнөм" тасмасында көрсөтүлгөн (фоторепортаж)

Бүгүн, 21-апрелде Бишкек шаарындагы "Манас" кинотеатрында "Быйыл сөзсүз күйөөгө тием" тасмасынын 1-2-бөлүгүн тарткан режиссёр Ырыс Жоомартова эми "Апа, быйыл сөзсүз үйлөнөм" тасмасын эл назарына койду.

Тасмада режиссёрлук милдетти аткаруу менен бирге башкы каармандардын биринин образын жараткан Ырыс Жоомартова тасма тууралуу мындай дейт: "Тасманын сценарийи 2 айда жазылды. 1 айда тартып бүттүк. Тасма аркылуу эненин балага болгон камкор мамилесин, сүйүүгө достук аркылуу жетүүгө болорун, ала качуу туура эмес деген көз карашты көрсөттүк. Азыр көпчүлүк жаштар материалдык байлыкка кызыгышат. Тасмада "байлыкка кызыкпагыла, сүйгөнүңөр менен кол кармашып бактылуу болгула" деген ойлор айтылат. Башкы каармандын образын жараткан Данияр Асанбековду кастинг өткөрүп, өзүмө окшоштуруп тандап алдым".

Тасмада башкы каарман Аскар жалгыз бой эненин баласы. Апасы шаардагы дарыканаларды дары менен камсыз кылат. Күн сайын апасынын "25ке чыктың. Качан үйлөнөсүң?" деген суроосунан тажаган Аскар "апа, быйыл сөзсүз үйлөнөм" деп Каракол шаарына таенесинин үйүнө сапар алат. Ал жактан Арууке аттуу жөнөкөй, сулуу кызды жактырып калат. Шаардык жигитке айылдын сулуусун оңой эле карматып коюшмак беле, албетте, каршы адамдар чыгат. Жадакалса кызды башка эле бирөөлөр ала качууга чейин барышат. Сүйүү үчүн күрөшкөн башкы каарман көптөгөн сыноолорго туш болот... Быйыл сөзсүз үйлөнөрүн айткан жигит көздөгөн сүйүүсүнө жетеби же Аруукени ала качкандар сүйгөнү менен ажыраштырабы? Мүмкүн, акча, бийлик баарынан жогору турат чыгар... Суроолорго тасмадан жооп табууга болот.