Жогорку Кеңеште 2013-жылдын бюджети талкууланды

12-ноябрда ЖКнын Бюджет жана финансы боюнча комитетинин жыйынында «КРнын 2013-жылга карата республикалык бюджети жана 2014-2015-жылдарга божомол жөнүндө» мыйзам долбоору талкууга алынды. Өлкөнүн Каржы министри Ольга Лаврованын айтымында, ички дүң продукциясынын өсүшү 7 пайыз көлөмүндө же 305487,5 миллион сомду түзөт. Ал эми 2014-жылдагы өсүш 7,6 пайыздын, 2015-жылы 7,8 пайыздын тегерегинде күтүлөт. Келерки жылы мамлекеттик бюджет кирешесинин жалпы көлөмү 98496,6 миллион, республикалык бюджеттин кирешеси 86288,5 миллион сомду түзсө, 2014-жылы 89458,2 миллион, 2015-жылы 96590,7 миллион сом болуусу күтүлөт. Бул мыйзам долбоору тармактык комитеттердин биргелешкен жыйындарында жана ай аягында өткөрүлө турган парламенттик угууда талкууланмакчы.