Ош. Статистика кызматкерлерин куттуктоо иш-чарасы болду

Бүгүн, 22-апрелде Ош шаарында Кыргыз Республикасынын Мамлекеттик статистикасынын 90 жылдыгы белгиленди. Салтанаттуу аземге өкмөттүн Ош облусундагы ыйгарым укуктуу өкүлү Таалайбек Сарыбашов, Ош шаарынын вице-мэринин милдетин аткаруучу Мирлан Исраилов, Ош шаардык жана облустук мамлекеттик статистикасынын кызматкерлери катышты. Бул тууралуу мэриянын басма сөз кызматы кабарлайт.

Ош шаарынын мэриясынын атынан статистика кызматкерлерин вице-мэр Мирлан Исраилов куттуктап, Мамлекеттик статистика кызматы ары даңазалуу, ары татыктуу жолду басып өткөндүгүн баса белгиледи.

“Кара кыргыз облустук революциялык комитетинин 1926-жылдын 29-апрелиндеги токтому менен Кыргыз статистика комитети түзүлүп, статистикалык маалыматтарды топтоонун жооптуу милдети жүктөлгөндөн бери айтканга жеңил болгону менен, кылымга жакын мезгилди камтыган тарыхый жолду басып өттү. Коомдун өнүгүшүнүн бардык этаптарында статистикалык маалыматтарга болгон муктаждыкты камсыздап, ак ниет менен жоопкерчиликтүү иштеп келе жатасыздар”,- деди М.Исраилов.

Салтанаттын жүрүшүндө Ош шаарынын мэриясынын атынан статистика системин өнүктүрүүгө кошкон бараандуу салымы үчүн Мамлекеттик статистика кызматынын айрым кызматкерлери Ардак баракча жана акчалай сыйлыктар менен сыйланышты.