"Нариман Түлеевдин түрмөдөн бошотулганы коомчулукта ар кандай ойлорду жаратууда" дейт депутат

Бишкектин экс-мэри Нариман Түлеевдин түрмөдөн эрте бошотулганы коомчулукта кайчы пикирлерди жаратууда. Бул тууралуу SUPER.KG порталына Жогорку Кеңештин депутаты Наталья Никитенко билдирди.

Анын айтымында, Н.Түлеевдин мунапыс аркылуу бошотулгандыгында мыйзам бузуу фактылары болгон-болбогону белгисиз. "Негизи, чоң чиновниктер чоң жаңжалдар менен камалып, кийин мунапыс аркылуу бошотулганда, коомчулукта көптөгөн суроолор жаралат. Мындай чиновниктер мыйзамдын негизинде бошотулган болсо да, бул маселенин моралдык жагы болот", - деди Никитенко.

Эскерте кетсек, 7-майда Бишкек шаарынын мурунку мэри, Жогорку Кеңештин экс-депутаты Нариман Түлеев 4 жылдан кийин эркиндикке чыккан.

Түлеев 2013-жылы коррупциялык иштер боюнча айыпталып, 11 жылга эркинен ажыратылган. Мындай чечимди Бишкектин Ленин райондук соту чыгарган.

Экс-мэрдин үй-мүлкү конфискацияланып, өзү күчөтүлгөн тартипте жаза мөөнөтүн өтөмөй болгон. Ошондой эле Түлеев 3 жыл мамлекеттик кызматтарда иштөө мүмкүнчүлүгүнөн ажыратылган. Ал "2008-жылы мэр болуп турганда Кытайдан автобустарды алып келүү иштеринде мамлекетке ири көлөмдө зыян келтирген” деп айыпталып, 2012-жылдын октябрь айында камакка алынган. Ленин райондук сотунун чечимин жокко чыгаруу үчүн Нариман Түлеев шаардык сотко кайрылган, бирок 2014-жылы 23-декабрда шаардык сот райондук соттун чечимин күчүндө калтырып, өзгөртүү киргизген эмес. Ал эми 2015-жылы 21-январда Жогорку Кеңештеги "Ата Журт" фракциясынын депутаты Нариман Түлеев мөөнөтүнөн мурда мандатынан ажыратылган.