Казакстанда "бийликти басып алууга аракеттенген" деген шек менен чиновниктер кармалышты

Казакстанда "бийликти басып алууга аракеттенген" деген шек менен бир топ чиновник кармалды. Бул тууралуу өлкөнүн Улуттук коопсуздук комитетинин басма сөз кызматына шилтеме берүү менен казакстандык басылмалар жазып чыгышты.

Маалыматтарга ылайык, дем алыш күндөрү Астана, Алматы жана Шымкент шаарларында жеке ишкер Тохтар Тулешовдун пикирдештери колго түшкөн. "Алардын арасында экс-башкы прокурордун биринчи орун басары, конституциялык кеңештин мүрунку мүчөсү Ильяс Бахтыбаев, облустук Ички иштер департаментинин мурунку башчысы Хабритулла Доскалиев, облустук Ички иштер департаментинин башчысынын орун басары Сакен Айтбеков, аскер бөлүктөрүнүн командирлери Бекзат Жумин жана Кайрат Пернебаев бар. Алар СИЗОго камалышты. Учурда алардын баш коргоо чарасы каралууда", - деп жазышат басылмалар.

“Шымкентпиво” ишканасынын ээси, жеке ишкер Тохтар Тулешев 30-январда Шымкент шаарында кармалган. Ал баңгизаттарын мыйзамсыз жүгүртүү, бир топ оор жана өтө оор кылмыштар боюнча күнөөлөнүүдө. Бул кылмыштардын ичинде адам өлтүрүү жана адам уурдоону уюштуруу, денеге оор залал келтирүү, рейдерлик да бар.

Тергөөнүн маалыматтарына ылайык, Тулешов былтыр бийликти басып алууну даярдоо иштерин жүргүзгөн. Нааразычылык акцияларды жана массалык тополоңдорду уюштуруп, ал альтернативдик өкмөттү түзүү аркылуу бийликтин түзүмүн өзгөртүүнү пландаган", - деп айтылат маалыматтарда.