Казакстандын премьер-министрин Кыргыз Республикасынын Биринчи вице-премьер-министри тосуп алды

Казакстандын премьер-министри Карим Масимов баштаган делегация Бишкекке келди. Бул тууралуу өкмөттүн басма сөз кызматы билдирди.

Маалым болгондой, "Манас" Эл аралык аэропортунда Казакстандын премьер-министрин Кыргыз Республикасынын Биринчи вице-премьер-министри Мухаммедкалый Абылгазиев тосуп алды.

Айта кетсек, Казакстандын өкмөт башчысы Карим Масимов бүгүн, 7-июнда Бишкек шаарында Кыргыз Республикасынын төрагалыгы астында өтүүчү КМШ мамлекеттеринин өкмөт башчыларынын жыйынына катышуу үчүн келди. Ошондой эле Казакстандын өкмөт башчысы Кыргыз-казак өкмөт аралык кеңешинин VI жыйынына катышат.

Жыйын алкагында Кыргыз Республикасынын Премьер-министри Сооронбай Жээнбеков Казакстандын премьер-министри Карим Масимов менен эки тараптуу жолугушуу өткөрөт.

Жыйын соңунда бир катар эки тараптуу документтерге кол коюлат, эки өлкөнүн өкмөт башчылары жалпыга маалымдоо каражаттары үчүн биргелешкен билдирүү менен чыгышмакчы.