Бишкекте 12 жаштагы баланы тоногон адам кармалды

Бишкекте 12 жаштагы баланы тоногон адам колго түшкөнүн ИИМдин маалымат кызматы билдирди. Маалым болгондой, 51 жаштагы Б.К. аттуу Бишкек шаарынын тургуну милиция кызматкерлерине арыз менен кайрылган. Анын айтымында, 15-апрелде саат 16:00дөр чамасында Садырбаев жана Маликов көчөлөрүнүн кесилишинен белгисиз адам күчкө салып анын жашы жете элек О.К. аттуу 12 жаштагы баласынын “Самсунг-Галакси” үлгүсүндөгү уюлдук телефонун тартып алган. Ленин РИИБинин кылмыш иликтөө кызматкерлеринин ыкчам аракетинин жүрүшүндө кылмышка шектүү 20 жаштагы Б.Э. аттуу адам кармалган.