Маевка айылынын тургундары айыл өкмөтү жерди мыйзамсыз сатканын айтып, Ак үйдүн алдына митингге чыгышат

Чүй облусунун Маевка айылынын тургундары "айыл өкмөтү жерди мыйзамсыз сатты" деген нааразычылык менен Ак үйдүн алдына митингге чыгышат. Бул тууралуу бүгүн, 11-июлда Маевка айылдык кеңешинин депутаты Манас Аликулов билдирди.

Анын айтымында, 2002-жылдан бери Маевка айыл аймагында мыйзамсыз иштер жасалууда. "Айыл өкмөтүнүн башчысы жерди коррупциялык жол менен мыйзамсыз сатып жатат. Элдин үнүн айыл жетекчилери укпай калышты. Биз эми 13-июль күнү Ак үйдүн алдына митингге чыгабыз", - деп билдирди Аликулов.

Буга чейин мыйзамсыз иш-аракеттер боюнча мурдагы 1-вице-премьер-министр Аалы Карашовго кат аркылуу кайрылышкан.

"Калктын маселесин чечүү үчүн учурдагы 1-вице-премьер-министр Мухаммедкалый Абылгазиевге кайрылганбыз. Бирок бир канча убакыттан бери жооп боло элек", - деп кошумчалады Аликулов.