Балыкчы шаарында жааган мөндүрдүн тийгизген кесепетинен келтирилген чыгым 10 миллион сомдон ашты

18-июль күнү кечке жуук 20 мүнөт катуу жааган жаан аралаш мөндүрдүн кесепетинен Балыкчы шаарынын ички ирригациялык каналдары толуп, ашып, шаардын ички көчөлөрүн, турак жайларды суу каптап кеткен. 20-июлда Өзгөчө кырдаалдар министрлигинин Ысык-Көл облустук башкармалыгы тарабынан 700 литр күйүүчү-майлоочу май өзгөчө кырдаалдын кесепетин жоюуга бөлүнүп берилген. Андан сырткары ар кандай оорулардын чыгып кетишине каршы байкоо жүргүзүлүп, суу каптаган үйлөр жеринен
дизенфекцияланды.

Жарандык коргонуу комиссиясы тарабынан изилдөө иштери жүргүзүлүп, жыйынтыгында 10 715 225 сомдук материалдык чыгым келгени аныкталганы 22-июлда белгилүү болду.