Жарандарды өз укугун билүүгө үндөгөн "Көз караш" долбоору ишке ашып, чоң көлөмдөгү көз айнек орнотулду

Бишкек шаарында темирден жасалган көлөмдүү көз айнек орнотулду. Идеяны алып чыккандар шаарга көрк кошуп, инфраструктуралык курулуштарга байытуу, мындан сырткары көз айнек аркылуу тургундарды өз укугун билүүгө үндөө максатын көздөшкөн.

"Аталган идеянын жаратуучулары - борбор калаадагы "DOXA" арт тобунун мүчөлөрү. Бул эмгек "Көз караш" долбоорунун алкагында жасалды. Ал укуктарды билүүгө үндөйт", - деп билдирди Борбор Азиядагы дебаттык ассоциациянын координатору Айзада Токтогулова.

"Жаштардын мындай идеясын толугу менен колдоп, борбор калаада жаштар көп жүрүүчү Жаштар аллеясына кооздолуп жасалган көлөмдүү көз айнектин орнотулушуна уруксат бердик. Мындай практика Европа өлкөлөрүндө көп кездешет. Шаардыктарды жана келген конокторду өзүнө тартуу үчүн чыгармачыл адамдар фантазиясына жараша иштеп чыгышат. Мындан ары ушундай жаштар менен иштешүүгө даярбыз", - деп билдирди Ленин районунун акими Нурдин Тынаев.

Ал эми көз айнектин жаратуучусу Сергей Келлер төмөнкүлөргө токтолду: "Мен бул идея боюнча көпкө ойлонуп жүрдүм. Жыйынтыгында досторум менен ишке өттүм. Бүгүн ачылыш аземинде жалпы эл менен эмгегимдин акыбетин көрүп жатам. Көз айнек аркылуу жаштар өз укугу жөнүндө ойлонот деп ойлойм".

Белгилей кетсек, бийиктиги 2,5, туурасы 5, узуну 6 метр келген көз айнек борбор калаада жасалган. Көз айнектин жанына жерге "Өз укуктарыңды коргоо үчүн аны билишиң керек" деген сөз жазылган.