Кыргыз армиясынын Абадан кол салуудан коргонуу күчтөрүнүн 10 жылдыгы белгиленди

Кыргыз армиясынын Абадан кол салуудан коргонуу күчтөрүнө 10 жыл толду. Ага карата 27-июлда
99718-аскер бөлүгүндө салтанаттуу иш-чара өтүп, ага Куралдуу күчтөрдүн Башкы штабынын, Коргоо иштери боюнча мамлекеттик комитеттин, министрликтердин өкүлдөрү катышты. Башкы штабдын жетекчиси Райимберди Дүйшөнбиев: "Абадан кол салуудан коргонуу күчтөрүнүн аскер кызматчылары аскердик коопсуздукту коргоодо Куралдуу күчтөрдүн башка кызматчылары менен бирдикте өлкөбүздүн эгемендүүлүгүн, аймактык бүтүндүгүн сактоодо өздөрүнүн алдына коюлган милдеттерди абийирдүүлүк менен аткарып жатышкандыгын терең урматтоо менен баса белгилегим келет", - деди.

Иш-чара моторлуу дельтапландын көрсөтмөлүү учуулары жана майрамдык концерт менен аяктаганын билдиришти Башкы штабдан. Белгилей кетсек, Кыргыз армиясынын Абадан кол салуудан коргонуу күчтөрү Кыргыз Республикасынын Президентинин 2006-жылдын 27-июлундагы буйругуна ылайык түзүлгөн.