Чүй облусунда “таксистке бычак такап, унаасын тартып алган” деп шектелгендер кармалышты

Чүй облусунда “таксистке бычак такап, унаасын тартып алган” деп шектелгендер кармалышты. Бул тууралуу бүгүн, 1-августта Чүй облустук ички иштер башкы башкармалыгынын басма сөз кызматы билдирди.

Окуя үстүбүздөгү жылдын 30-июль күнү саат 03:15 чамасында Новопокровка айылында болгон. Анда эки белгисиз адам 29 жаштагы А.Д. аттуу таксистти бычак менен коркутуп, Тойота Камри үлгүсүндөгү унаасын айдап качып кетишкен.

“Бул факт боюнча дароо ыкчам иликтөө иштери жүрүп, Бишкек-Торугарт унаа жолунун 34-чакырымында Тойота Камри унаасы токтотулган. Бирок ичиндегилер талааны аралай качып кетүүгө үлгүрүшкөн. Кылмышкерлерди издөө иштерине кинологдор тартылып, алардын жардамы менен кылмышка шектүү катары 22 жаштагы Р.А. жана 22 жаштагы Г.В. кармалган. Учурда кылмыш иши козголуп, тергөө амалдары жүрүүдө”, - деп айтылат Чүй ОИИББинин басма сөз кызматынын маалыматында.